Désirée

Bona sëira, bona nuet, ie ulësse me prejenté:
mi drë inuem ne diji nia, son cunesciuda sciche Désirée.
Tan de ani che é, caranta ie bele passei via,
m’é vagà vel’ uperazion y śën ne se ntënden plu de nia.
Cie che feje de lëur chël ne possi ve dì
ajache scenó cun la lege ei da ciampì,
mé tant, l se trata de n lëur orizontal
y monce drët bel me sal.

Mi prufescion ie cunesciuda sciche la plu vedla sun chësc mond,
ma l ie for mo tei che fej finta de ne savëi nia n chësc cont.
Sambën ënghe tlo da nëus ne stajëde pa a miné,
che fosse stata la prima che fova da abiné.
Coche dij bele mi inuem ie ejaudësce
uni vosc dejidere ajache l cunësce.
A dì l’aurità n’iel pa nianca tan speziel,
ove tosc capì cie che plej a n tel ël.

Duc chisc ëi, duc chisc ëi,
chisc ie mi gran plajëi,
jëuni o vedli, biei o burc, nia dinrer maridei,
duc chisc ëi, duc chisc ëi,
chisc ie mi gran plajëi,
ie me n tole un ndolauter, datrai doi, monce trëi.

De chisc ëi possi dì, ie ne ue pa bravé,
é cunesciù mpo n valguni, giut pudëssi cunté:
diretëures y ministri, gran atëures y aucac,
danterite monce vel’ preve y duc feji unì mac
y ajache te mi lëur n’iel deguna pension
me ei anjenià n tel pitl liber dal telefon
ulache scrije su cun gran lezitënza
inuem, di y ëura de uni prejënza,
tu y tu y tu y
duc chisc ëi, duc chisc ëi,
chisc ie mi gran plajëi,
jëuni o vedli, biei o burc, nia dinrer maridei,
duc chisc ëi, duc chisc ëi,
chisc ie mi gran plajëi,
ie me n tole un ndolauter, datrai doi, monce trëi,
cater, cinch, sies o set y datrai monce ot.