I spirc

Tu n’ lasces ora nia, ies dlonch leprò,
ne es mei dl’aurela per pensé do.
Te ues for fé deplù y drët a duc,
te lëures di y nuet per ti fruc.
Te uloves arjonjer velch per ti jënt
y deventé for miëur y plu cuntënt.
Chëi che t'ulova bon ne spies’a plu
y chëi che t'oves gën ne pënses plu.
Tu scinches roba mpede duné tëmp,
te scuses ora for bel valënt,
ues vester tlo per duc, ne n’ies mei stanch,
tu es pu tan da jì for plu inant.

Y śën es mel de cë y l magon es pesoch,
tu es i nierves trac y l sanch es tosc toch.
Ne te ies no bon de maië, ne te ies no bon de durmì y dantaldut n gran uet.
Y śën te damandes: “Cie suzed pa cun mé?”
Y śën te damandes: “Cie dëssi pa fé?”
Y śën te damandes: “Cie ei pa fat?”
Chisc ie i spirc che te es cherdà,
chisc ie i spirc che te es cherdà
y per chisc spirc te es amalà, te es amalà.

Mpede viver es for laurà,
mpede duné es for cumprà,
mpede dì n iede “ie te é gën”
es for mé dit “va bën bën”.
N’ spartësces mei ti cruzi tu stes mé da sëul
l amor di autri ne vëijes nia, l ie ncherscëul.
Y śën che t’es arjont dut chël che te uloves
te rëndes permò cont che te trapuloves,
té nstës es trapulà y l magon es pesoch,
tu es i nierves trac y l sanch es tosc toch.
N’ te ies no bon de maië, n’ te ies no bon de durmì y dantaldut n gran uet.
Y śën te damandes: “Cie suzed pa cun mé?”
Y śën te damandes: “Cie dëssi pa fé?”
Y śën te damandes: “Cie ei pa ie fat?”
Chisc ie i spirc che te es cherdà,
chisc ie i spirc che te es cherdà
y per chisc spirc te es amalà, te es amalà.

Y śën te damandes: “Cie suzed pa cun mé?”
Y śën te damandes: “Cie dëssi pa fé?”
Y śën te damandes: “Cie ei pa ie fat?”
Chisc ie i spirc che te es cherdà,
chisc ie i spirc che te es cherdà
y per chisc spirc te es amalà, te es amalà.