Grostycraut

L fova n iede n jëun de Gherdëina,
da uem, mé che l ova danz for feter la brea plëina.
Lascià de jì a scola, fat la prima sfola,
tl Bemmel de tati che ie jit ora dla cola.
Mucià iel bel riesc tla coa de si landa,
ma zënza ciof y cun mascra da Panda.
Śën fovel inò sëul, la landa muceda,
finalmënter n pue’ de gheneda…
per tò dezijions che reverdova si daunì,
y cun chi viver si vita da uni di.
La ueia de se n jì ti piciova sciche mustlons,
y nsci fovel muet per l mond, zënza tëma y a varons,
a Beistoan, a Mumbai, a Dheli y a Hong Kong,
a Bangkok a pië su la codles da pingpong,
ma ntan che la sos ju per l tofu regurova,
ti ie tumà ite cie che ti manciova.

Grosti y craut, che sushi ne uei pa plu,
jufa cun smauz, cie ues’a mo deplù?
Mpede fondue, pan sëch y n go’ de bon vin,
nioch da patac, ce bon n cëif ladin.

Tres la stredes de Tokyo cun na gran fam,
a crì zachei che fej fanziëutes da pan.
Ie pa chël śën massa de damandà?
Dajëme ca n taier cun bales da fuià.
Pulentina de furmenton y mo n pue’ de crafuncins,
chëi ie pu mé sciche gyōza, ma n pue’ plu ladins.
La ula giamëta laveda y cueta,
sculeda, sturzeda y su sun furchëta.
Ch’l jëun ne pensova śën nianca plu al’ëiles,
ajache l se semiova de puessl da mëiles.
Si cë fova ribl, nsci ovel for dit,
pulënta me stënta tl diare ovel scrit.
Papaciuei ne uei, nia inier y nia ncuei,
y panicia me sgricia ti ovel dit a si nevicia.
Co dijo’a for si nevicia?

Grosti y craut, che sushi ne uei pa plu,
jufa cun smauz, cie ues’a mo deplù ?
Mpede fondue, pan sëch y n go’de bon vin,
nioch da patac, ce bon n cëif ladin.
Grosti y craut, che sushi ne uei pa plu,
jufa cun smauz, cie ues’a mo deplù ?
Mpede fondue, pan sëch y n go’de bon vin,
nioch da patac, ce bon n cëif ladin.