FUAG

Son nasciù te na valeda massa strënta,
cun n gran tacuin, ma danz for n pue’ la stënta.
Che la jënt se lamënta, te fej pa chël marueia?
Puec dis de bel y cun massa dis de plueia.
L’ega true’ massa mola, l fuech true’ massa ciaut,
y nce l consum de mi Defender ie bestiale aut.
Chëi dla Tankstelle, chëi ie pu duc trëi farabuc,
“Chëst ann ai bën dat ora feter puec contribuc.”
La sajons ie massa curtes, la nëif massa frëida,
dal ujin de nuet a spusté n fruz l pel de sëida;
dërc de spersa, ie rat’ che la vën ala dures,
“ajache per ntant ei finà la cubatures.”

Tu te lamëntes bën suvënz,
Ma rì pa pu nchin che te es mo dënz.
Mpede fé i punies dame la man,
y po’ muevela su y ju bel plan.

Scué ie mpurtant, ma dantaldut dan si porta,
l ujin me à dit che ti banana ie storta;
che la va nderzeda, sciche i bujes de streda,
Ch’l buj va strupà per l bën de nosta valeda.
Aspieta ma, cël’ti ma, son pa mé ie che sà chi che ti fra se à fat,
ajache chël vën dit te bar po’ muessel vester l’urità.
Al didancuei ie duc busienc sciche na bulëura,
malan de na pecunia che fej unì fiëura.
Duc mé plu blingbling, deguni plu pengpeng,
a mi prëibel lat zënza lat, ma perchël cun ginseng;
na tel broda ne se merita nianca l piec patin,
“Ma bestia, ne à pa ch’sta struscia mei na fin?”

Tu te lamëntes bën suvënz,
Ma rì pa pu nchin che te es mo dënz.
Mpede fé i punies dame la man,
y po’ muevela su y ju bel plan.
Tu te lamëntes bën suvënz,
Ma rì pa pu nchin che te es mo dënz.
Śën finela mé via de biaberné,
scenó giapes l ciucio per te fé scuté.

Me fé scuté ie plu rie de chël che n po’ miné,
sciche ti dé n piene a n las y dì che l dëssa se piné;
l ne à nia bert, Gherdëina verd, l ie dut massa tert,
śën finela mé via de rì y cun nëus fé pert de chëi che sta for ert.
Te na valeda de artisć ie monce se lamenté n’ert,
te na valeda de fic l jëun vën metù na da pert.
La roda raida y nchin che nes passa la fiëura,
“mo inant na bela sëira y assudëi duman dala medema ëura.”