Te perjon

Belau trënt‘ ani sons patron
de chësta bela perjon.
Cie fossel pa de Urtijëi,
sce Ujep Antone s’la fajëss’ valëi,
perchël ei ie tan n gran unëur.
Mé morc y lotri fossel da udëi,
nianca na lira ne fossel plu ncuei.
Dut mé gaunri, leresc, rabri,
nianca segur ne fossa l Anri,
sc’ ie ne foss’ t’ chësc luech de cura
uni seniëur dijëss’: “Che paura!”
Y l majer macaron
po’ deventëssa l prim violon.
Y propi nsci pra mi unëur,
sce ie ne foss’ for pra mi lëur.
Y chësta mëina sciche sce nia ne foss’,
cun l pitl dëit de Ujep Antone de Poz.

La Mene foss’ mo sa Sneton
sce ie ne fossi tlo patron.
N nés da lump,
n uedl brum,
na urëdla morsa via.
Ma Ujep Antone n’ se tëm pa nia,
cun uniun la fejel via.
Perchël me à dat l coser tan de gradi
che degun ne à te mi biei ani.
Ël sona dessegur n tel falot,
ce bela lerch che l ie tl numer ot!

Cie? Co? Ce spavënt!
Ie tlo te chësc bur busc!
Ie, tlo te chësc bur busc!
Ma dantaldut uei me senté per cunscidré,
povester che la m’ va fata.

Patron: Śën dime tosc y no mentì
da ulache t’ies tu śën unì.

Perjunier: Ie vënie ca dal Mulibar,
tuman ntëur da uni var,
y po’ me tën n carabinier,
y cun n curdon
me tirel te perjon.

Patron: Vo bur bachët y dinamiter,
y chi che vo sëis śën vo prësc me l dijëis.

Perjunier: Ie son dutor per uni mel,
ie salv’ a uniun la pel,
sé da fé udëi l zot de rëur,
y da fé jì l viac daredëus.
Victoria, baldoria, valevaleria juhoirassà,
victoria, baldoria, valevaleri juché.

Patron: No fé cuntert, Vo maladët,
vo se nfidëis, vo tlo sëis tëis.

Perjunier: Te chësta santa cësa,
Idie me la perdona,
perchël prëie piciadëur
fajëdeme unëur.

Patron: Udù n ei mo tei lotri tlo,
ma sciche chësc ne fo’i nia no.

Perjunier: Ma tan che ël ne à pensà,
pra l pont de dëibl l ei tucà.

Perjunier: Tu ies tan plën de sapiënza
che n po’ te dì eminënza,
tu es tlo n grum de biei gradi,
o angiul cie ues’a deplù?
O mi seniëur nia tan da rì,
śën ëis da pensé tlo mé a mi.

Patron: Te ëss’ bën gën de cuer,
sce l vin foss’ ti amor.
T’ lascëss’ bën fé na viva
sce ie ne fossi tlo.
Śën jide ite t’ vosc busc scur,
unide do zënza bruntlé.

Perjunier: Gran guardian va tu mé dant
tei gran stivei n’es nia debant.
Gran guardian va tu mé dant
l sona te mi deit’.

Patron: Stajëde tlo, mi obligo me cherd.

Perjunier: O stame bën tu gran acort,
co dëss’ pa fé a m’la striscé?
Foss’ pu finà cun ch’sc gran infiern,
me sà da dessené
che ie tlo muess’ sté.
N bel salut o vedla perjon,
bën ue mi vedl cumpani,
mi bon cumpani,
tu ies n galanton.

Patron: Chësc ve nfidëis a dì dan mé.

Plu mutons: O ce bon che ie śën l vin ju a Ianon
y na gran baraca su a Sneton.

Patron: L inuem dala giustizia ve prëi de tlo scuté.

Perjunier: Cun vosta cianfonies
lechëme l spinel.

Patron: Sce tu ies tan valënt
cun chësc t’ fajons cuntënt.

Perjunier: Te ciuna gota, ëuca ce bona.

Patron: Nonono, o nia per truep,
pu po’ buons almeno tant.

Perjunier: Tan de cuscienza śën tulëve
la despënsa per n got,
chësc ie pu vin dl Faujëina,
l ie chersciù te Gherdëina.

Patron: Pu dëssi pa dé do?
Ma n got ie vënie a tò.

Perjunier: Ce bel che l chimpl śën taca,
na cioca dal ma ca!
Chësc polver va śën ite t’ si vin.
Pona ti fejel bon defin!
Vedl zessa zessa ca da mé drët bel daujin,
ie te é śën drët gën, drët gën defin.
Jeton su a n auter nosc bon cumpani,
chi che uel fej blòt
chël drosa ju si got!

Patron: Ce sëur che l à damò!

Perjunier: O jeta mé snel do!
Chël che te sà bon,
te fej nce nton.

Patron: Ce sëur che l à damò!

Perjunier: O jeta mé snel do!
Chël che te sà bon,
te fej nce nton.

Perjunier: Jon mé inant cun chësc bel lëur,
o cël’ti a chësc culëur.
Cëla pa che chësc berba ie tosc al aldilà,
ce gran suenn y ce stanch,
sun chësc aspitons.
Tan saurì che ël gësc,
genau sciche n dochs.

Patron: O mé n tel pitl juech...
Perjunier: ne sté mé a t’auté.
Perjunier: Ël dorm śën tan bon saurì.
Ël dorm śën tan bon saurì.
L sà mo da snurtlé.

Perjunier: Dorm mé tu orco ti cioca mé ora,
canche tu leves sons nëus da port’ ora.
Ca cun la tleves po’ gëuri su,
dorm saurì che te ies tan stanch,
tol chësc per speda y chësc mo per am,
na bela cazina per laterna te ons fat.

Perjunieres: Dorm vedl dorm,
tu ies n vedl mut,
ne sté a bever tan nghëus
canche t‘ giapes l vin debant da nëus,
dorm vedl dorm!
Y nëus y nëus jon ora de perjon, ora de perjon
y tu amor stes tlo.

Perjunieres: Dorm saurì, dorm saurì nosc vedl lumpon, vedl lumpon
y nëus se n jon sa Sneton.
Ne pudon mpo no sté pro té
a nëus do ne se poss’ cialé,
canche t’la beves y canche t’la beves inò
dësses vester plu sant su insom.