Na sëira de bona ueia cun i candidac SVP (Auril 1990)

Vo savëis mi bona jënt,
l frabiché ie n pitl spavënt,
n pue’ che t’ mueves y proves a fé,
vëni riesc a te sciaché,
i te stropa la veranda
y t’ proibësc l tët de banda.
[: te pos‘ fé ndrët, te pos‘ fé stort,
la cumiscion te dà for tort. :]

Tu te pënses descuns’là
y bel’ bëndebò dess’nà,
chël ulëssi propi udëi
chi ch’ cumanda a Urtijëi
y dal bunder chi ch’ chësc ie
ves debota a te cunsië;
[: te sautes tlo y sautes iló,
te ruves for pra Go de Go! :]

Un à dit che sun Chemun
foss’l stat na “oposizion”,
n valgun tei sozialisć
o sogor vel’ .. co? .. munisć.
N fo’a ti, che s’ temo’a da mat
dala batalies ch’ i ëssa fat,
[ma a dé de contra – che foss’ sta’ si lëur
se ai plutosc lascià sun Flëur. :]

Ne n’ie pa nia zeche de bon
na tel gran coalizion?
I 16 uemes pra la prova
à dut sambën bel’ fat ora.
Chi ie pa bon de me spieghé
coch’ la vën po’ a s’l dé
[: che pra na vela bel y blot
vala ora 9 a 8? :]

Nëus son jënt de gran cultura
y cialon ala natura.
Tla natura iela nsci
che l vërt ie l prim a unì
po’, bel plan giapa la flëures
do y do de biei culëures;
[: tla politich iel “umgekehrt”
cie ch’ fova cueciun – ie śën vërt. :]

Uniun fajan si lëur,
à cialà de fé l miëur,
un fo’a drët bon de rujené,
l auter mo miëur de mancé.
N diplom per gran merit
ai perchël dat ca cu‘ l scrit:
[: “a Chiodi” l dottor honorius causa
per assenteismo senza pausa”. :]

It’ te Sëlva fej “gonz koltsch”
candidieren trëi ambolc,
po‘ n ai mo doi sëurora,
co faj’rai pa, a s’la fé ora?
Tré la busca – o cie fé
per cialé d’ l numiné
[: o fé sc’che la Hockey d’Urtijëi
y n mëter su n doi o trëi. :]

Sun la lista dla DC
iesi duc do l ABC,
plu gën ëssel fat cariera,
ma l ne po’ mudé bandiera.
Ma a sté pra chël che n à
n’ iel pa nia de resià;
[: ël à for giapà si “Sitze”,
ma l ie stuf de fé for “Vize” :]

Tel persones dala roces
n iel su‘ la listes plutosc pueces.
Scenó ti vëniel fat la beles,
ma śën vëijen a de teles
mo plu ëiles sun chemun
chël ratëssi, ne uel degun,
[: duc ch’i ëi, chël muess’ capì,
ne ëss’ te n colp plu nia da dì. :]

Fé l ambolt chël ie n lëur
plën de cruzi y unëur,
eh, t’adroves na persona,
la plu bela, la plu bona,
per chësc “Amt”, lascëve dì,
tlo se paiel a jì a crì
l majer de nosta val,
ie dijësse n cardinal.