Anda Trina da Juntlan

1.
Anda Trina da Juntlan
tol la sportula y va a pan,
śera l giat te majon,
mët la spëisa a scundon.
La se spaza y śera l usc,
y fir debota jun ch’l Busc:
pu la va de se spazé,
sc’ la uel mo ncuei zech‘ giapé.

2.
A ch’l Cristl da Pedracia
ai messù tò via na vacia,
n la giapa bon marcià,
cërn de terza cualità.
Cassù sa Fëur te chël ciulé
spartësc po‘ ora ch’l gran beché:
Anda Trina se ncunforta
sun ch’la cërn de vacia morta.

3.
Śën vala cun si grum
y fir debota ora l cunsum,
compra vëtes, zandli, oles,
smauz, pulënta y n ste de cioles.
Stof da fé n bel gurmel
y a si vedl mo n bel ciapel,
tol mo pea n catl nuef
y mo n’ombrela per canch‘ l pluev.

4.
Po‘ fir’la ja l Sartëur,
iló ala pa da lëur,
la adrova mo farina,
tamejons per la gialina.
N sach d’avëina per l ciaval
y a si muta mo n drë bel scial,
na cassa de pezi mo leprò
y n pue‘ de leché a ch’l pitl bo.

5.
Ajach‘ la ie iló daujin,
se strisc’la via dal ujin
y damanda sce l ne n’à
na tendëdla da bon marcià.
La talpines ie n spavënt,
fej n dann al pra termënt,
njiniede ca mo n pue‘ de fiertrat
y na copa per mi giat.

6.
Śën bëis’la sa l Faujëina
cun na prëscia scich‘ na bëila,
tol n fiasco da trëi lira
per si vedl ch‘ à tan la ciera.
Zucher, soda y paprica
y na ghernea dajëme ca,
de chësc y de chël se tolela n slech
y po‘ fir’la ja l apotech.

7.
Trëi pachetli de puestl de cëura,
ch‘ l’à tan la tos ch’la puera mëura,
y mo n pue‘ de vaselina
y per mi cuer na medejina.
Y mo zech‘ da unghënt
y n’asperin per l mel de dënt
y per chël che m‘ ei pensà inier:
pu na pumpa da clistier.

8.
Śën vala a sparon
a cumpré furmenton,
va a crì l muliné,
ajach‘ l’à zeche da maj‘né.
Compra na struzn da na lira,
mët cin‘ śemli sun stadiera,
trëi gran sbalz ala po‘ trat,
y fir debota sa l Sigat.

9.
Po‘ dijela a ch’la Stina:
“Dame lana bona y fina,
pluma, flaura per n plumac
y diesc chilo de patac.
Fazulëc n ëis de blòc
y mo cater de ch’i angloc,
n miscel de fil da cujì
y n giaulon a ch’l fantulin.“

10.
Śën vala sun ch’l Plan,
Anda Trina da Juntlan,
urta Barbl de Mureda
y ti dà na batuleda.
Les à note che l ie n spavënt
a drajé de bona jënt,
strita y svëia via y ca,
y tosc tl ciuf se ales pià.

11.
T‘ustaria sa Mauriz
do mëisa ite te ch’l piz
Anda Trina s’à sentà
y debota apustà.
N got de vin y gran liania
fej tan bon do na tel cania:
o, la va de se spazé
ch‘ é mo n bel gran grum da fé.

12.
Ta l Śotler śën trapin’la
a cumpré na ciavazina,
fej cuncé l socudel
che l ne ti feje al bo no mel,
l hintergross ie zarà,
l zuglot ne ie mo finà:
o, la va de se spazé
su y ite dal calighé.

13.
“Me cuncëis’a i ciauzei,
me cuncëis’a i stivei,
cie costa pa ch’i scafaroc:
a, ma chëi me sà tan blòc!
Na fermea ëssi gën
y n pèr de vëtes da ciauzel che tën:
o, la va de se spazé
ch‘ uei mo ncuei sa Juntlan ruvé.“

14.
Po‘ cëlela te tacuin
y vëij ch’i grosc ie jic a fin,
pea sgors su sa Juntlan
cun n pëis bel plan streflan.
Po‘ se pënsela: “Ce lëur,
che n à mo dut nia cumprà,
bon ch‘ a cësa sons ruveda:
y mi fadia ie nsci fineda!“