Sela

Sela, Sela, Sela, Sela, tu mont mirà ladin,
de nosta valedes nosc ujin,
gran monumënt al ciel auzà,
da nëus ladins ies tu amà.
Superb se spënj alaut‘ ti prei
plëns de pastures su sot ti tuei
ulach‘ tarluies se mpea luminan
y sëites de fuech se taia stlefan
cun tëunesc che urla ju sot ti burons .
Iló su saluc ladins damandons.

Sela, Sela, Sela, Sela, tu mont plu sant ladin,
amà ies tu bën zënza fin,
tu gran autere da Idie crià,
per duc cajù ies tu senià.
Gherlandes de ciofs da mont l curona,
i crëps de gran belëza rejona
canche l surëdl tramonta lucënt,
ti pizes se ndurea de cueciun revënt,
dumbries se zera, se zera tl brum di lastons.
Dan ti maiestà, gran Die, s‘ snudlons.

Sela, Sela, Sela, Sela, tu mont plu bel ladin,
t‘ saludon Dolomit de cuer defin,
da Frea Mëisules, Piz Boè,
ulons per for pra té resté.
La nuet leva prësc tl scur,
la luna docà per mont flurësc,
po‘ udons ti odles y pizes che se mpian
tl linëus de la stëiles su y su dut stizan.
Nosc cuer dan Idie, dan Idie devot se nchina
al bel de nosta tiera ladina.