O aria dl bosch

Me n vede tl bosch, iló iel bela gh’neda,
iló iel tan chiet y nia ne me sta te streda,
deguni ne me chier, degun ne m’astiel‘ ora,
ne t’audes’a nianca na sëul‘ parola.
Ma aude te n iede rauscian,
l ie l vënt che vën dalonc
y passa danter i lëns ora.
O aria dl bosch, che t’sofles tan lesier,
tu me fej’s unì n bon pensier,
tu dl bosch ies la meludia,
datrai cun gran forza, ma po‘ t’archietes inò via.

Tu bosch ies chël post ulache l ie na gran pesc,
tla natura l luech che zënzauter l plu plej.
Per duc ch’i tieres ch‘ pra té albergëia
es tu na gran cura y ti fejes da ciajea.
Ma ntant se fej’l dant’rëures; i lëns mo se nchina
al vënt che passa ti porti gran stima.
O aria dl bosch, che te sofles tan lesier,
tu me fej’s unì n bon pensier;
tu dl bosch ies la meludia,
datrai cun gran forza, ma po‘ t’archietes inò via.

O aria dl bosch, o aria dl bosch.