Nëus de Gherdëina

Sciche n ciof da d’ansciuda, coche la dumbries d’autonn,
passenons nëus de Gherdëina te nosc bel raion,
coche la ierbes tan reres che flurësc mé da si sajon,
nsci sons nëus chersciui su tla val dl Derjon.
Cun na ravisa tan sana, cun la rujeneda de l’ava,
pudons vester cuntënc de chël che nëus on
y sce son n pue’ d’autri pudons bën dì,
nosta jënt de Gherdëina ie fata nsci.

Sëlva, Sureghes, Urtijëi y Santa Crestina,
nëus on zeche de scundù che degun ne s’abina
y chësc zeche messons se mantenì
scenó n di o l auter messons mo jì a s'l crì.

Chëi che abù la fertuna,
d’avëi te Gherdëina si cuna
o chi che d’un o dl auter viers ie unit ite tla val,
sce t’ies nasciù te Custacia,
o su sota Bulacia,
ulache tu ies da cësa l plu bel te sal.
Un ie nasciù te Plan da Tieja,
n'auter nia dalonc da dlieja,
l ie nce unfat de ce viers che te vëighes l Saslonch,
sce t'ies da Sacun, Soplajes o de Plan
per l inuem de Gherdëina dati na man.