Mi cësa

O mi blòta cara cësa,
ciauda coa da pitl insù,
bel paravis m’ies for tu stata
fin da canche son nasciù.

Ref.:
L ciof che ne desflurësc mei nia,
sentà tl plu bel vërt dla val,
scebën tra i crëps y suvënz tla nëif,
chël ies tu, o cësa mia!

Chersciù su sons grant y san
danter ti muredes giut;
m’es fat de bën a corp y ana,
dat ti amor me es tu dut.

Ref.

O tan bel che l ie a cësa,
pra nosc pere y nosta oma,
fred’sc y surans ntëur na mëisa,
s’la cuntan y s’la ciantan.

Ref.

Sce per l mond dalonc me n vede,
sce descuns’là nzaul ie son:
pënsi a cësa no mé n iede,
pënsi a canche inò s’udron.

Ref.

O mo chësc tan dejidrëssi,
blòta cësa, nia deplù:
mé nce murì per té ulëssi,
sot al tët che son nasciù.

Ref.