Spëisa da zacan

Ne n’iel pa nia zeche de bon, spëisa da zacan?
Zeche de drët per j magon canche l à na drëta fam.
N rezet che nes ie unì da ntlëuta tramandà
da ch’la scura cësadafuech ulache l univa sfumià.

Y perchël chi che uel po’ mo al didancuei maië sciche n iede,
mé per dì papaciuei, jopa arestida bele daduman,
pan de siela gramblà su uni di dut l ann.
Crojul, rabescitl bele da mesdì,
bales y panicia, ma mé vel’ di,
crafuncins da tlozes y de tei nioc, de chëi nia massa n grum,
fava y fersëiles canche l ie giajun.

Chëi che ne à mo mei ciarcià, ne à mo mei sapù
cie che l uel dì avëi maià zeche che tën pasciù,
y sce tlo se à truep mudà y n maia for miëur,
a ch’la spëisa da zacan lascëi ch’la bona sëur.

Y perchël bele n iede, chël savons,
ovi dut tan san, farina de furmenton,
spëisa de segosta ora dla salmueia
y mei ne manciova pa n criedl de bona ueia,
tëurta da la’ vërt, datrai n bon crafon
canche l fova nzaul segra n valgon,
y datrai dan jì a durmì y per no maië pesoch,
jufa, puessl, n taier de jopa da cioch.