La streda amez ite

L n ie de tei che ne fej nia
y na pert sta te ustaria,
i mutons n‘ fos‘ nia dandò,
cëla ënghe plu gën pro.
Cun si lëur n‘ai nia legrëza,
chël ti porta mé stanchëza,
duta l‘ena ne sai cie fé,
ma n dumënia muessi paussé.

Pra na boza de bon vin
y la chertes bel daujin,
sentei ju biei ustinei,
inant de jì n fajons mo trëi.
I rejona tan da mac,
semea che I ie dut avocac,
po' bën a cësa n pue‘ grames
a crì su ch'la bela fënes.

Macaron de n gran baloch
ies'a bel‘ inò ruvà cioch,
va mé ulache t'ies sta‘ nchin śën,
ma i conc fajons duman,
mel de cë y n drë brujëur,
I fos' inò da jì tl lëur.

Po' jons a crì i sindacac,
laurëis pu massa sëis'a mac?
I autri sauta ncantëur,
for n drë not y tan da lëur.
I se zera y davania,
se vaghé nia y mé sparania.
Lauré a fosch n'ie nia saurì,
sc' i finanzri ëss' da unì.
Mandli, corchi, scentimento
y mo bolla companiamento.

Y n di po' bel mpont,
controllo fischio dut debant.
Registri, bolle y ce pëura,
i damanda bel' trëi ëura.
Sce on fa' fauz dijons perdono,
scenó fajons'a bën condono.
Ti dijons che on tan la stënta,
po' sons'a ora dla pulënta.

Lauré massa ne ie nia bon,
de fé nia se stufon',
ma nzaul fossel pa scrit,
tol la streda amez it'.
N pue‘ goder y la vaghé
y datrai mo s'la cianté,
jì a spaz chël fej tan bon
iló restons mo giut nton.