Ulon Ve lecurdé

Ref.:
Ncuei ulons ve lecurdé
coche la ie unida a s'l dé,
che Gejù ie nasciù te n medel
y nia coche n rë te n gran ciastel.

Na nuet sarëina y frëida assé
n grum de jënt caprò muessa ruvé.
Betlehem, na gran zità
ulache dut l popul vën cumpedà.
Ënghe Maria y Ujep ie ruvei
dal viac sfadiëus iesi stanc y finei.
Maria aspieta y se stënta a jì,
Ujep uel jì a crì zeche da durmì.

Ël tachelnea pra na porta de lën,
ma deguni ne gëura, deguni ne vën.
Ël proa tlo y proa plu n via,
ma inió n‘iel bon de abiné nia.
Maria ie stancia y ulëssa paussé,
ma deguni te cësa ne uel i lascé.
Scioldi ne ovi danz nia n grum,
ma tant per paië ovi bën abinà adum.

Na landa i vëija y se mëina picià
a udëi i doi jëuni ce ert che i sta,
y ëila i manda ora n pastura
ulache i pastri ie usei a fé na vita dura.

Te n medel abini n pue‘ de stram
ulache i possa durmì nchin daduman.
N bo y n musciat ti fej cumpania
y sciauda l Bambin nasciù ntëur mesanuet via.